7 sparetips i kvardagen som gjer ein forskjell

Du treng ikkje snu opp ned på heile økonomien. Ofte er det små justeringar som gjer det lettare å få oversikt, bruke pengane meir bevisst og spare litt undervegs. Her er sju sparetips som kan gjere ein forskjell i kvardagen.

1. Få oversikt over kva pengane går til

Det er vanskeleg å spare viss du ikkje heilt veit kvar pengane blir av. Start derfor med å sjå over kva du faktisk brukar pengar på i løpet av ein vanleg månad.

Sjå etter faste utgifter, småkjøp og ting du kanskje betaler for utan å tenkje så mykje over det. Mange oppdagar at det ikkje er dei store kjøpa som gjer mest utslag, men mange små beløp som blir trekte litt her og litt der.

Når du får betre oversikt, blir det også lettare å sjå kvar det kan vere rom for å justere.

2. Del opp pengane dine

Mange synest det er lettare å halde oversikta når pengane er fordelte på fleire kontoar. Då blir det tydelegare kva som skal gå til rekningar, kva som er til kvardagsbruk, og kva som bør få stå i fred.

Du kan til dømes ha:

• ein konto til faste rekningar
• ein konto til kvardagsbruk
• ein bufferkonto
• ein sparekonto til mål du vil nå

Det treng ikkje vere avansert. Poenget er å gjere økonomien enklare å følgje med på.

3. Sjå over abonnementa dine

Det er fort gjort å betale for ting du ikkje brukar så mykje lenger. Kanskje har du ei straumeteneste du nesten aldri opnar, ein app du har gløymt, eller eit abonnement som berre har blitt ståande.

Ta ei lita opprydding og spør deg sjølv om du faktisk brukar det du betaler for. Sjølv eitt eller to kutt kan gjere ein forskjell i løpet av eit år.

4. Planlegg litt før du handlar

Mat er ein av postane der små grep fort kan merkast. Du treng ikkje bli veldig strukturert, men det kan hjelpe å tenkje litt gjennom kva du treng før du handlar. Ei enkel handleliste, ein grov plan for nokre middagar eller ein rask sjekk av kva du allereie har heime, kan gjere det lettare å unngå småhandling og matsvinn. Det kan gi deg betre oversikt og mindre stress i kvardagen.

5. Bygg buffer litt etter litt

Det er lettare å kjenne at du har oversikt når du veit at du har litt å gå på dersom noko uventa skjer.

Ein buffer treng ikkje vere stor frå start. Det viktigaste er å kome i gang. Litt og litt kan vere nok til å gi meir tryggleik i kvardagen.

Bufferen kan hjelpe når straumrekninga blir høgare enn venta, noko heime må fiksast, eller det dukkar opp ei utgift du ikkje hadde planlagt.

6. Gjer sparinga automatisk

Det er ofte lettare å spare når du slepp å hugse det sjølv. Set du opp eit fast trekk til sparekonto, blir sparinga ein vane i staden for noko du må ta stilling til kvar månad. Nokon likar å spare eit fast beløp rett etter løning. Andre føretrekkjer å spare litt undervegs.

Viss du vil kome i gang i det små, kan Mikrospar vere eit enkelt alternativ. Då sparer du litt kvar gong du brukar kortet. Det viktigaste er ikkje kva løysing du vel, men at ho fungerer for deg.

7. Begynn smått og vel det som passar deg

Du treng ikkje gjere alt på ein gong. Ofte held det å starte med eitt eller to grep som gjer kvardagen litt enklare.

Kanskje er det nok å:

• gå gjennom abonnementa dine
• opprette ein bufferkonto
• planleggje handlinga litt betre
• setje opp automatisk sparing

Små endringar kan vere nok til å gi deg betre oversikt og litt meir rom i kvardagen.

Små grep kan gjere kvardagen enklare

Det er lett å tenkje at sparing må vere strengt eller krevjande. Men ofte handlar det meir om å gjere nokre smarte justeringar som passar inn i livet slik det faktisk ser ut.

Når du får litt betre oversikt, ryddar litt i utgiftene og gjer sparinga enklare, kan det gi både meir ro og litt meir fridom i kvardagen.

Vil du ha endå betre oversikt, kan du også lese Slik får du betre oversikt med enkle grep i mobilbanken. 

Nokre gonger er det også fint å sjå på økonomien saman med nokon. Våre autoriserte rådgivarar i Vekselbanken hjelper deg gjerne, og du er velkomen til ein uforpliktande prat.